August 1, 2021, Sunday
२०७८ श्रावण १७, आईतवार

कोरोना खोप ल्याउन निजी कम्पनीलाई पनि अनुमति दिइने

काठमाडौं, कोभिड– १९ विरुद्धको खोप आयातका लागि सरकारले निजी कम्पनीहरूलाई अनुमति दिने भएको छ । स्वास्थ्यमन्त्री हृदयेश त्रिपाठीले एक–दुई दिनमै निजीलाई खोप ल्याउने वातावरण बनाउने बताए ।

निजी कम्पनीले ल्याएको खोप लागत मूल्यमा १० प्रतिशतसम्म मात्रै नाफा लिएर बेच्न पाउने मन्त्री त्रिपाठीले बताए । खोप ल्याउन औषधि व्यवस्था विभागबाट अनुमति लिनुपर्नेछ । तर, विभागमा अनुमतिका लागि एउटा पनि निवेदन परेको छैन ।  विभागको सूचना अधिकारी सन्तोष केसीले अनुमति मागे प्रक्रिया पूरा गरेर दिन सक्ने बताए ।

निजीले खोप ल्याउने भएपछि खोप किनेर लगाउन सक्ने, तर सरकारको प्राथमिकतामा नपरेका वर्गका व्यक्तिसँग खोप लगाउने विकल्प हुने सरकारको आकलन छ । अहिलेसम्म १४ लाखभन्दा बढी नागरिकले कोभिड– १९ विरुद्धको खोप लगाएका छन् ।

दोस्रो डोज लगाउने समय नजिकिँदै छ । तर, सरकारसँग मौज्दात खोप साढे ६ लाखको हाराहारीमा मात्रै छ । स्वास्थ्य मन्त्रालयले २० लाख खोप खरिद गरेकोमा १० लाख मात्रै नेपालले प्राप्त गरेको छ । १० लाख भारत सरकारले अनुदानमा दिएको छ भने करिब साढे तीन लाख कोभ्याक्स सुविधाबाट आएको छ । अहिलेसम्म पाँच प्रतिशत जनताले मात्र पहिलो डोजको खोप लगाएका छन् । 

सरकारले ५० लाख डोज खोप ल्याउन खरिद प्रक्रिया अघि बढाएको थियो । तर, सेरम इन्स्टिच्युटले तत्काल दिन नसक्ने र मूल्य पनि एक डलर बढी लिने भएपछि सरकार खरिद गर्न अलमलमा परेको छ । भारतको सेरम इन्स्टिच्युटले उत्पादन गरेको कोभिसिल्ड खोप र चीनको ‘सार्स कोभ २ भ्याक्सिन (भेरो सेल) इनएक्टिभेटेड’लाई आकस्मिक प्रयोगका लागि सरकारले अनुमति दिएको आजको नयाँ पत्रिकामा खबर छ ।

शीर्ष समाचार

धेरै पढिएको