October 19, 2021, Tuesday
२०७८ कार्तिक २, मंगलवार

तिहारमा निर्धक्क विद्युत खपत गर्न प्राधिकरणको अनुरोध

काठमाडौं, नेपाल विद्युत् प्राधिकरणले यही हप्तादेखि सुरु हुने तिहारमा यो वर्ष विद्युत् खपत घट्ने प्रक्षेपण गरेको छ । विगत वर्षहरूमा तिहारको लक्ष्मीपूजाका दिन १३ सय मेगावाटसम्म विद्युत् खपत हुने गरेको थियो । तर, यो वर्ष अधिकतम १ हजार २५ मेगावाटसम्म विद्युत् माग हुने प्रारम्भिक प्रक्षेपण भएको प्राधिकरणको भारप्रेषण केन्द्रका प्रमुख सुरेशबहादुर भट्टराईले जानकारी दिएका छन् । ‘प्राधिकरण भने अधिकतम १४ सय मेगावाट विद्युत् माग भए पनि उपलब्ध गराउन सक्ने अवस्थामा छ,’ उनले भने । 

तिहारमा कुनै किसिमको खपत बढ्ने सम्भावना नभएर नै कार्ययोजना वा विशेष तयारी खासै छैन । यो वर्षको तिहारको लक्ष्मीपूजा शनिबार (२९ कात्तिकमा) पर्छ । लक्ष्मीपूजाको दिन सबैभन्दा धेरै विद्युत् खपत हुने विश्वास गरिन्छ । प्राधिकरणले पर्याप्त बिजुली आपूर्ति गर्ने भएकाले २४सै घन्टा निर्धक्क भएर विद्युत् प्रयोग गर्न आग्रहसमेत गरेको छ । ‘प्राधिकरण धेरैभन्दा धेरै विद्युत् खपत होस् भन्ने चाहन्छ,’ उनले भने । तिहार मनाउनका लागि बत्ती बाल्न कन्जुस्याइँ गर्नुपर्नेछैन । ‘प्राधिकरण अहिले धेरैभन्दा धेरै मानिसले बत्ती बालून् भन्ने चाहन्छ,’ प्रमुख भट्टराईले भने । 


विगत वर्षहरूमा उपत्यकामा झन्डै ३ दर्जन मझौलादेखि ठूला तारे होटेलसम्म खुला हुने गरेका थिए । पर्यटक यही सिजनमा नेपाल घुम्न आउँथे । तर, यसपटक कोभिड–१९ का कारण होटेल खुला भए पनि उनीहरूले खपत गर्ने विद्युत् ठूलो परिमाणमा घट्ने प्राधिकरणको भनाइ रहेको आजको नयाँ पत्रिकामा खबर छ । त्यस्तै, यो वर्ष ठूला व्यापारिक भवन र मलहरूमा पनि विद्युत्को खपत न्यून हुनेछ । कतिपय उद्योग सञ्चालनमा छैनन् भने घरेलु उद्योग पनि बन्द भएका छन् ।

त्यस्तै, साना–साना भए पनि पसलहरू बन्द छन् । ‘यसले पनि विद्युत् लोड घटाउने हामीले सोचेका छौँ,’ केन्द्र प्रमुख भट्टराईले भने । यसपटक घरघरमा केही बढी बत्ती बले पनि त्यसले माग वृद्धिलाई उल्लेख्य बढाउनेछैन । कुनै वेला लाइन ट्रिप भएर वा हावाहुरी र अन्य प्राकृतिक कारणले केही समय विद्युत् रोकावट भए पनि त्यो सामान्य अवस्थामा कुनै किसिमको अभाव नहुने प्राधिकरणको भनाइ छ । प्राधिकरणले यो वर्ष काठमाडौंमा हुने विद्युत् खपत नै घटेको बताएको छ । 

शीर्ष समाचार

धेरै पढिएको