२० करोड नागरिकलाई कोरोना खोप दिने राष्ट्रपति बाइडेनको घोषणा
वासिङ्टन, अमेरिकी राष्ट्रपति जो बाइडेनले राष्ट्रपतिको हैसियतले काम गरेको पहिलो सय दिनमा २० करोड नागरिकलाई कोरोनाको खोप दिने घोषणा गरेका छन् । राष्ट्रपति बनेपछि पहिलो पटक आयोजित आधिकारिक पत्रकार सम्मेलनमा राष्ट्रपति बाइडेनले सो घोषणा गरेका हुन् ।
लक्ष्य महत्वाकांक्षी रहे पनि यसमा आफूहरु सफल हुने बाइडेनको विश्वास छ । अन्य मुलुकको तुलनमा अमेरिकाले अहिले गरेका पहल सकारात्मक ढंगले अघि बढेको उनको भनाइ छ ।
अमेरिकामा अहिलेसम्म कोरोनाभाइरसको खोपको करिब १३ करोड मात्रा दिइसकिएको छ । हाल दैनिक करिब २५ लाख खोपको मात्रा अहिले वितरण भइरहेको छ ।
पत्रकार सम्मेलनमै बाइडेनले दोस्रो कार्यकालका लागि पनि आफूले उम्मेदवारी दिने बताएका छन् । उनले सन् २०२४ मा पनि उम्मेदवारी दिने बताएका हुन् ।
७८ वर्षीय बाइडेन अमेरिकाको इतिहासमै राष्ट्रपति हुने सबैभन्दा पाको व्यक्ति हुन् । उनले केवल चार वर्षको कार्यकाल सम्हाल्ने अनुमान लगाइएको भएपनि उनले अर्को कार्यकालमा पनि उम्मेदवारी दिने घोषणा गरेका हुन् ।एजेन्सी
प्रतिकृया दिनुहोस्