अमेरिकी संसदको तल्लो सदनको बैठक रद्द, संसद भवनबाहिर गुप्तचरको धम्कीपुर्ण सूचना
वासिङ्टन, अमेरिकी संसदको तल्लो सदन (हाउस अफ रिप्रेजेन्टेटिभ्स) को आज बोलाइएको बैठक रद्द गरिएको छ । गुप्तचर विभागबाट प्राप्त सूचनाका आधारमा उक्त बैठक रद्द गरिएको हो ।
अमेरिकी अखबार वासिङटन पोस्टका अनुसार कुनै आक्रामक स्थानीय समूह बिहीबार ‘क्यापिटल’ (अमेरिकी संसद) मा प्रवेशका लागि प्रयास गर्ने चेतावनीयुक्त सूचना प्रहरीले प्राप्त गरेको थियो ।
सोही चेतावनीपछि क्यापिटल भवन बाहिर प्रहरीको अतिरिक्त टोली परिचालन गरिएको छ । प्रहरीले कुनै पनि सम्भावित खतराका लागि आफू तयार रहेको जनाएको छ ।
‘हाउस अफ रिप्रेजेन्टेटिभ्स’ को निर्धारित बैठक रद्द भए पनि सोही भवनमा रहेको सिनेटले भने नियमित कारवाही अघि बढाउने भएको छ । सो सिनेटमा राष्ट्रपति जो बाइडेनद्वारा पेश गरिएको १.९ ट्रिलियन डलरको ‘कोभिड राहत बिल’ माथि बहस गर्ने बिहीबारको कार्यसूची छ ।
क्यापिटल प्रहरीका अनुसार राज्य प्रहरी, स्थानीय प्रहरी र केन्द्रीय एजेन्सीहरूसँग मिलेर त्यस्तो कुनै पनि सम्भावित घटना रोक्नका लागि प्रयास भइरहेको छ ।
‘हामीले गुप्तचरमार्फत जुन जानकारी पाएका छौं, त्यसलाई निकै गम्भीरतापूर्वक लिएका छौं । हामीले पाएका जानकारीलाई गम्भीरतापूर्वक लिँदै तिनलाई प्रेस सामु उजागर गर्न सक्दैनौं,’ क्यापिटल पुलिसका एक अधिकारीलाई उद्धृत गर्दै बीबीसीले जनाएको छ ।
यसअघि जनवरी ६ मा पूर्व राष्ट्रपति डोनाल्ड ट्रम्पका समर्थकको एउटा समूह प्रहरी सुरक्षा घेरालाई तोड्दै क्यापिटल भवनमा प्रवेश गरेको थियो ।
प्रतिकृया दिनुहोस्