एरिजोनामा टुरिस्ट बस पल्टिँदा एकको मृत्युु, दुई जना गम्भीर घाइते

क्यानयोन, एरिजोनामा ग्रान्ड क्यानयोन जाँदै गरेको टुरिस्ट बस पल्टिँदा एक जनाको मृत्यु भएको छ भने दुईजना गम्भीर घाइते भएका छन् । सो दुर्घटना उत्तर पश्चिमी एरिजोनामा शुक्रवार दिउँसोतिर भएको मोहाभ काउन्टी शेरिफ कार्यालयले जनाएको छ ।

सो बसमा ४८ जना सवार थिए भने चालकको मृत्यु भएको हो । दुई जनालाई हेलिकप्टरबाट उद्वार गरि उपचारका लागि किंगम्यान क्षेत्रीय मेडिकल सेन्टरमा लगिएको थियो । अन्य ४५ जनालाई भने सामान्य चोटपटक लागेको र उनीहरुको उपचारका लागि अस्पताल पुर्‍याइएको एरिजोनाका स्थानीय सञ्चारमाध्यमले जनाएको छ ।

उक्त घटनामा कुनै अन्य गाडीहरू संलग्न थिए कि थिएन भन्ने अझै अज्ञात रहेकोे त्यहाँका स्थानीय प्रहरीले बताएका छन् । दुर्घटनाको वास्तविक कारण भने अझै खुलेको छैन । दुर्घटनाग्रस्त बस लास भेगासबाट आएको थियो र राष्ट्रिय निकुञ्ज बाहिर अवस्थित ग्रान्ड क्यानयोन पश्चिमतर्फ जाँदै गरेको बताइएको छ ।