सिट क्षमताभन्दा बढी यात्रु नचढाउन सर्वोच्चको आदेश

काठमाडौं, सार्वजनिक यातायातका साधनमा रहेको सिट क्षमताभन्दा बढी यात्रु नचढाउन सर्वोच्च अदालतले अल्पकालीन अन्तरिम आदेश जारी गरेको छ ।

मंगलबार न्यायाधीश अब्दुल अजीज मुसलमानको एकल इजलासले निर्धारित सिट क्षमताभन्दा बढी यात्रुलाई सार्वजनिक सवारीमा नचढाउन र सवारीभित्र यात्रुको इच्छाविपरीत ठूलो स्वरमा म्युजिक सिस्टम नबजाउनसमेत अल्पकालीन अन्तरिम आदेश दिएको हो ।

टंकप्रसाद भट्टराईलगायतले दायर गरेको उक्त रिट निवेदनमा सुनुवाइ गर्दै सर्वोच्चले छलफलका लागि दुवै पक्षलाई बोलाएको छ ।

यसैगरी, रिट निवेदनमा प्रधानमन्त्री तथा मन्त्रिपरिषद्को कार्यालय, भौतिक पूर्वाधार तथा यातायात मन्त्रालय, गृह मन्त्रालय, यातायात व्यवस्था विभाग, काठमाडौं उपत्यका ट्राफिक प्रहरी कार्यालय लगायतलाई विपक्षी बनाइएको छ।