July 19, 2024, Friday
२०८१ श्रावण ४, शुक्रबार

यी चार जिल्लामा बाढीको उच्च जोखिम

आज (मंगलवार) नवलपरासी (पूर्व-पश्चिम) पाल्पा र रूपन्देही आसपास भई बहने नदी तथा स-साना खोलमा पानीको बहाव उल्लेख्य बढ्ने देखिएको छ ।

बाढी पूर्वानुमान महाशाखाका अनुसार यी चार जिल्ला आसपासका नदी तथा खोलामा आकस्मिक बाढीको जोखिमसमेत रहेको छ । यी चार जिल्लाका नदी तटीय क्षेत्रमा उच्च सतर्कता अपनाउन महाशाखाले आग्रह गरेको छ ।
यस्तै, नवलपरासी (पूर्व), इलाम, झापा, मोरङ, सिन्धुपाल्चोक, काठमाडौं, ललितपुर, भक्तपुर, मकवानपुर, चितवन, गोरखा, लमजुङ, कास्की, तनहुँ, स्याङजा, गुल्मी, अर्घाखाँची, कपिलवस्तु र दाङ आसपास भई बहने केही स-साना नदीहरूमा समेत पानीको बहाव उल्लेख्य बढ्ने सम्भावना छ ।

यी क्षेत्रका केही नदी तगथा खोलामा समेत आकस्मिक बाढीको जोखिम रहने महाशाखाको पूर्वानुमान छ । यी जिल्ला आसपास भई बहने नदी तटीय क्षेत्रहरूमा पनि उच्च सतर्कता अपनाउन महाशाखाले अनुरोध गरेको छ ।

साथै पाँचथर, संखुवासभा, ओखलढुंगा, रामेछाप, सिन्धुली, उदयपुर, रसुवा, दोलखा, बाग्लुङ, पर्वत, प्यूठान, रुकुम पूर्व, रूकुम पश्चिम, बाजुरा, बझाङ, अछाम, डोटी, डडेल्धुरा, बैतडी, दार्चुला, कैलाली र कञ्चनपुर र आसपास भई बहने केही स-साना नदी तटीय क्षेत्रहरूमा सामान्य सतर्कता अपनाउन महाशाखाले आग्रह गरेको छ ।

यता अविरल वर्षाका कारण बुटवलको तिनाउ नदीमा जल सतहले खतराको तह पार गरेको छ । रूपन्देहीका प्रमुख जिल्ला अधिकारी भरतमणि पाण्डेले तिनाउ नदीले खतराको तह पार गरेको र जिल्लाका सबै स्थानीय सरकारलाई यसबारे जानकारी गराउँदै सतर्क रहन आग्रह गरेका छन् ।