सरकारलाई दिएको समर्थन फिर्ता लिदै रवि

राष्ट्रिय स्वतन्त्र पार्टीले प्रधानमन्त्री पुष्पकमल दाहाल नेतृत्वको सरकारलाई दिएको समर्थन फिर्ता लिने भएको छ। भोलि (शुक्रबार) बस्ने केन्द्रीय कार्यसमिति र संसदीय दलको संयुक्त बैठकमा नै रास्वपाले सरकारलाई दिएको समर्थन फिर्ता लिन लागेको उच्च स्रोतको दाबी छ ।

यो बीचमा सभापति रवि लामिछानेले मुख्य दलका शीर्ष नेताहरुसँग बेग्लाबेग्लै भेटवार्ता गरिसकेका छन् । प्रधानमन्त्री दाहाल र कांग्रेस सभापति शेरबहादुर देउवाले सरकारमा सहभागी हुन आग्रह गरेका थिए । एमाले अध्यक्ष केपी शर्मा ओलीले भने एमाले, रास्वपासहितको नयाँ गठबन्धनको खाका प्रस्तुत गरेको चर्चा छ ।

पार्टीभित्र अधिकांश सांसदहरु अहिले सरकारमा जानुभन्दा प्रतिपक्षमै बस्नुपर्ने पक्षमा छन् । तर, सभापति लामिछानेले भने डेलिभरी दिनसक्ने मन्त्रालयको नेतृत्व पाए सरकारमा सहभागी भएर जनताको पक्षमा काम गर्नुपर्ने पक्षमा छन् ।

प्रधानमन्त्री दाहालले रास्वपालाई सरकारमा सहभागी गराउन हरस्म्भव प्रयास गरिरहेका छन् । उनी अझैपनि रास्वपा सरकारमा सहभागी हुनेमा विश्वस्त छन् ।

तर, लामिछाने भने भोलि नै सरकारलाई दिएको समर्थन फिर्ता लिएर प्रचण्डसँगको सहकार्य तोड्ने पक्षमा पुगेको विश्वस्त सूत्रको दाबी छ । लामिछाने अब सरकारमा पनि नजाने अनि दिएको समर्थन पनि फिर्ता नलिनेगरि अनिर्णयको बन्दी नबन्ने बरु प्रचण्ड सरकारलाई दिएको समर्थन फिर्ता लिने बोल्ड डिसिजन गर्ने मुडमा पुगेका छन् ।

आज साँझ र भोलि विहानसम्म प्रधानमन्त्री दाहालसँग कुनै समझदारी भए अर्कै कुरा नभए भोलि नै रास्वपा सरकारलाई दिएको समर्थन फिर्ता लिएर प्रतिपक्षमा बस्ने निश्चित् भएको छ ।