वैदेशिबाट बाकसमा फर्कंदा पनि दलालकै घेरामा

काठमाडौं, चैत २४ । वैदेशिक रोजगारीमा जानेहरूले पाइलापाइलामा दलालहरूको सामना गर्नुपर्छ । यिनै दलालको ठगीबाट आक्रान्त युवाको भिड थामिनसक्नु छ । तर यस विषयमा राज्य बेखबर छ ।

देशभित्र रोजगारी नपाउँदा युवाहरू दलालको सहयोगमा विदेश भासिन्छन्। वैदेशिक रोजगारीमा जाने युवाको दर जसरी बढिरहेको छ, त्यसैगरी वैदेशिक रोजगारीमा रहँदा मृत्युवरण गर्ने युवाको संख्या पनि उकालो चढिरहेको छ ।

वैदेशिक रोजगार बोर्डको तथ्यांकअनुसार त्रिभुवन अन्तर्राष्ट्रिय विमानस्थलबाट हरेक दिन औसतमा तीनवटा युवाको शव बन्द बाकसमा फर्किन्छन् । बाकसमा फर्किएका ती अभागी युवाका शवहरूलाई पनि दलाली आँखाहरूले त्रिभुवन अन्तर्राष्ट्रिय विमानस्थलमा खोजिरहेका हुन्छन् । विदेशको भूमिबाट जब शव बाकसमा बन्द भएर नेपाल ल्याउन ‘लोड’ गरिन्छ, यहाँ दलालहरू त्रिभुवन अन्तर्राष्ट्रिय विमानस्थल पुगिसक्छन् ।

उल्लिखित तथ्य बनावटी होइन । वैदेशिक रोजगारीमा रहेका युवाको मृत्यु हुँदा परिवारलाई प्राप्त हुने रकमको लोभमा दलालहरूले संगठित गिरोह नै सञ्चालन गरेको भनी प्रहरीले गरेको खुलासाबाट त्यसको पुष्टि हुन्छ ।.आजको नागरिक दैनिकबाट