विपद व्यवस्थापनका लागि साढे १० हजार बढि सुरक्षा फौज परिचालन

काठमाडौं, भारी बर्षासँगै आएको बाढी पहिरो तथा डुबानका कारण देशका विभिन्न क्षेत्र डुबानमा पर्नुका साथै ७६ जनाको मृत्यु भएको छ । मुलुकका जिल्लाहरुमा भईरहेको विपद व्यवस्थापन तथा उद्धारका लागि सशस्त्र प्रहरी बल, नेपालबाट १० हजार ५ सय ४० जना जनशक्ति परिचालित छन् ।

उक्त प्रहरी बलले बाढि, पहिरो र डुवानमा परेका २ हजार ८ सय ६० जनाको सकुशल उद्धार गरेको छ भने अहिलेसम्म ७२ जना वेपत्ता रहेका छन् । विपदमा परी ३६ जना घाइते र १ सय ९५ ठाउँमा भौतिक क्षति भएको छ ।

नेपाल प्रहरीले जानकारी दिए अनुसार उपत्यकाको काठमाडौ ललितपुर र भक्तपुर ३ वटै जिल्लामा २३ वटा बोट र गोताखोरसहित ९० स्थानमा करीब ४ हजार जनशक्ति परिचालित भई १ हजार ४ सय ५७ जनाको सकुशल उद्धार गरिएको छ भने ३४ जनाको मृत्यु, २१ जना वेपत्ता, १५ जना घाइते र २ स्थानहरुमा भौतिक क्षेति पुगेको छ ।

बागमतीमा काभ्रे, सिन्धुली, सिन्धुपाल्चोक, मकवानपुर, दोलखा, धादिङ र चितवन जिल्लामा गरी ४ सय ९४ जनाको सकुशल उद्धार गरिएको छ भने ३१ स्थानमा भौतिक क्षति, २९ जनाको मृत्यु, १९ जना घाइते र ३९ जना वेपत्ता भएका छन् ।

यसैगरी, कोसी प्रदेशको पाँचथर, ओखलढुङ्गा, धनकुटा, झापा, मोरङ, सोलुखुम्बु र सुनसरीमा गरी ८ सय ५३ जनाको सकुशल उद्धार गरिएको छ भने १ सय ५२ स्थानमा भौतिक क्षति, १० जनाको मृत्यु, ९ जना वेपत्ता र २ जना घाइते भएका छन् ।