April 13, 2024, Saturday
२०८१ बैशाख २, आईतवार

तनहुँमा जन्ती बोकेको जिप दुर्घटना – बेहुलीको बहिनी सहित तीनको मृत्यु

तनहुँ- जन्ती बोकेको बोलेरो जीप तनहुँको आबुँखैरेनी गाउँपालिका– १ गिराउनचौरमा आईतबार राती १२:३० दुर्घटना हुँदा मृत्यु हुनेको सङ्ख्या तीन पुगेको छ ।दुर्घटनामा गम्भिर घाइते हुनु भएका आँबुखैरेनी–६ बस्ने ५६ बर्षका शेरबहादुर गुरुङको चितवन मेडिकल कलेजमा उपचारको क्रममा सोमबार मृत्यु भएपछि उक्त सङ्ख्या पुगेको हो । यसअघि आबुखैरेनी गाउँपालिका–६ छापस्वाँरा बस्ने ७२ बर्षका आसपुर गुरुङ र व्यास नगरपालिका–९ गजौडे बस्ने १७ बर्षकी तुलसी गुरुङको घट्नास्थलमै मृत्यु भएको थियो ।

मृत्यु हुने तुलसी बेहुलीको बहिनी हुनुहुन्छ भने आसपुर र शेर बहादुर सहोदार दाजुभाई हुनुहुन्छ । आँबुखैरेनीको बरादी–हिलेखर्क स्थित भित्री सडक खण्डमा जन्ती लिएर फर्किने क्रममा बा १८ च ५९२१ नंम्बरको बोलेरो जिप दुर्घटना भएको हो । आइतबार राती १२:३० बजे जीप अनिन्त्रित भई सडक देखी करीव पाँच सय मिटर तल खसेको जिल्ला प्रहरी कार्यालय तनहुँका प्रहरी नायव उपरीक्षक मोहनबहादुर खाँडले जानकारी दिनुभयो । प्रनाउ खाँडका अनुसार दुर्घटनामा चालक सहित १५ जना यात्रु घाइते भएका छन् । घाइते भएकामध्ये नौ जनाको चितवन मेडिकल कलेज र छ जनाको स्थानीय आँबुखैरेनी अस्पतालमा उपचार भइरहेको छ ।

आबुखैरेनी गाउँपालिका– ६ प्युघर बस्नेहरु बर्ष १५ की सुबिना गुरुङ, बर्ष ६७ को मनबहादु गुरुङ, बर्ष ३८ की सुकमाया गुरुङ, बर्ष ६ की एलिसा गुरुङ सोही वडाको छापश्वारा बस्ने बर्ष १९ की सबिता गुरुङ घाईते हुनु भएको छ । यसैगरी बन्दीपुर गाउँपालिका–३ सुखौरा बस्ने बर्ष १० को शिसिर गुरुङ, चालक आबुखैरेनी गाउँपालिका–१ गिराउनचौर बस्ने बर्ष ३८ को राजकुमार विश्वकर्मा घाईते हुनु भएको छ । आबुखैरेनी गाउँपालिका–६ छापस्वारा बस्ने बर्ष ५६ को सोमलाल गुरुङ, आबुखैरेनी गाउँपालिका–६ प्युघरफाँट बस्ने बर्ष ७० को भक्कुलाल गुरुङ, आँबुखैरेनी–६ बस्नेहरु बर्ष ३६ की आसमाया गुरुङ, बर्ष १०की दीक्षा गुरुङ, बर्ष ५२ को सेते गुरुङ, बर्ष ३६ की चिजकुमारी गुरुङ, उहाँको छोरा १८ महिनाको सुसान गुरुङ र बर्ष ३७ की सुनिता गुरुङ घाइते हुनु भएको छ । दुर्घटनाको बारेमा अनुसन्धान भईरहेको प्रहरीले जनाएको छ ।

शीर्ष समाचार

धेरै पढिएको