June 19, 2024, Wednesday
२०८१ असार ६, बुधबार

जलवायु परिवर्तन सम्मेलनको २८ औँ (कोप–२८) मा प्रधानमन्त्री जाने

प्रधानमन्त्री पुष्पकमल दाहाल संयुक्त राष्ट्रसङ्घीय जलवायु परिवर्तन सम्मेलनको २८ औँ (कोप–२८) मा नेपाली टोलीको नेतृत्व गरेर जानुहुने भएको छ । आगामी मङ्सिर १४ गतेदेखि २६ गतेसम्म संयुक्त अरब इमिरेट्स (युएई) मा सम्मेलन हुँदै छ ।

प्रधानमन्त्री प्रचण्डले मङ्सिर १३ गतेदेखि १७ गतेसम्म कोपमा सहभागिता जनाउने प्रधानमन्त्रीका विकास व्यवस्थापन तथा वातावरणविज्ञ डा. पपुलर जेन्टल भुसालले बताउनुभयो । प्रधानमन्त्रीले आवश्यक व्यक्तिलाई मात्र समेटेर भ्रमण टोली बनाउन निर्देशन दिएकाले सुरक्षाकर्मीबाहेक अन्य १० जनाजति हुने उहाँले बताउनुभयो ।

“प्रधानमन्त्रीज्यूले जानैपर्ने र आवश्यक व्यक्तिलाई समेटेर भ्रमण टोली बनाउन निर्देशन दिनुभएको छ । त्यसो हुँदा सुरक्षाकर्मीबाहेक प्रधानमन्त्रीको टोली बढीमा १० जनाको हुन सक्छ,” उहाँले भन्नुभयो, “विदेश जाने भ्रमण टोलीको आधिकारिक रूपमा मन्त्रीपरिषद् बैठक बसेर निर्णय हुने छ ।”

प्रधानमन्त्रीसहित स्वकीय सचिवद्वय गङ्गा दाहाल, रमेश मल्ल, प्रधानमन्त्रीकै विकास व्यवस्थापन तथा वातावरणविद् डा. भुसाल, वन तथा वातावरणमन्त्री वीरेन्द्र महतो, वन तथा वातावरण सचिव दीपककुमार खराल र अर्थ सचिव कृष्णहरि पुस्कर जाने तयारी भएको भुसालले बताउनुभयो ।

यस्तै प्रधानमन्त्रीको भ्रमण टोलीबाहेक वन तथा वातावरण मन्त्रालयबाट नीति निर्माण गर्ने व्यक्तिको छुट्टै टोली बन्ने उहाँले बताउनुभयो । यस पटकको २८ औँ कोप महत्वपूर्ण भएकाले प्रधानमन्त्री जान लाग्नुभएको उहाँले जानकारी दिनुभयो ।

सम्मेलनमा नेपालले आफ्नोतर्फबाट जलवायु परिवर्तनमा गरेका राम्रा कामको विभिन्न ३६ वटा प्रस्तुति दिने छ । प्रधानमन्त्रीले सम्मेलनमा अरू उच्चस्तरीय भेटवार्ता गर्ने कार्यतालिका रहेको छ ।

शीर्ष समाचार

धेरै पढिएको