December 1, 2023, Friday
२०८० मंसिर १५, शुक्रबार

नयाँ भाडा तोकिए तर भाडा असुली धन्दा पुरानै

सार्वजनिक यातायातका साधनमा नयाँ भाडा दर लागु भए पनि बाजुराका सवारीचालकले भने पुरानै भाडादर उठाउने धन्दा यथावत् राखेको स्थानीयले गुनासो गरेका छन् । असोजमा जिल्ला प्रशासन कार्यालय सवारीसाधनको नयाँ भाडादर कायम गरेको हो ।

चालकले मनोमानी भाडा लिने गरेको गुनासो स्थानीय बाजुरावासीको छ। खप्तड छेडेदह गाउँपालिका–५ का स्थानीय धन रावतले सार्वजनिक सवारीसाधनको नयाँ भाडादर तोकिए पनि पुरानै भाडा लिने गरेको बताउनुभयो ।

उहाँले भन्नुभयो, “केही महिनाअघि प्रशासन कार्यालयले सवारीसाधनले लिने नयाँ भाडादर तोकेको थियो तर चालकले भने पुरानै भाडा असुली गर्ने गरेको छ ।” बल्देदेखि मार्तडी १६ किलोमिटर पक्की सडक छ  ।

त्यसको भाडा १३६ हुनुपर्ने हो तर जिपचालकले दुई सय लिने गरेको छ । त्यसै गरी बुढीगङ्गा–२, बल्देदेखि डोगडी छ किलोमिटर ग्राभेल र १६ किलो कच्ची सडक छ  । त्यसको नयाँ भाडा अनुसार ४४२ रुपियाँ हो तर छ सय रुपियाँ लिने गरेको रावतले बताउनुभयो ।

यता १०१८ जिपका चालक नरेश भण्डारीले भने प्रशासन कार्यालयले तोकेकै भाडा लिने गरेको बताउनुभयो। “तेल महँगो भएका कारण केहीले दुई/चार रुपियाँ बढी लिने गरेका होलान्, त्यो कुरा मलाइ थाहा भएन तर मैले भने तोकिएकै नयाँ भाडादर लिने गरेको छु,” उहाँले भन्नुभयो । यहाँका अधिकांश स्थानीय सामाजिक सञ्जालको पहुँचमा छन् । कुन जिपले बढी भाडा लिएको हो भन्ने कुरा सबैलाई थाहा भएकाले यात्रुले पनि नयाँ भाडा दिने गरेको चालक भण्डारीले स्पष्ट पार्नुभयो ।

उसो त बाजुरामा पटक पटक भाडादर कायम हुन्छ तर त्यो भाडादर कहिले पनि लागु हुँदैन। गाडी चालक र यात्रुबिच भाडाका विषयमा कहिल्यै सहमति पनि हुँदैन । योभन्दा पहिला पनि प्रशासन कार्यालयले पटक पटक नयाँ भाडादर कायम गरेको थियो ।

त्यो भाडादर तोकिए जस्तो गरी यात्रुले पैसा दिए पनि चालकले भने आफूले तोकिएकै भाडा लिँदै आएका छन्। यता जिल्ला प्रशासन कार्यालयले प्रत्येक वर्षमा भाडादर घटाउँदै जाने उता तेलको मूल्य बढ्दै जाने गरेकाले व्यवसायीलाई जिपको किस्ता तिर्नै सकस हुने गरेको चालक बताउँछन् ।

गत असोजमा प्रशासन कार्यालयले जिल्लास्थित जिप व्यवसायी, स्थानीय, जनप्रतिनिधि, पत्रकार सबैको सहमतिमा पक्कीमा आठ ग्राभेलमा १५ र कच्ची सडकमा एक किलोमिटरको २२ रुपियाँ नयाँ भाडादर कायम गरेको थियो । तर जिपचालक तथा यातायात व्यवसायीले त्यो भाडादर लागु नगरी मनोमानी भाडा लिने गरेपछि स्थानीयले गुनासो गर्दै आएका छन् । नयाँ भाडादरभन्दा बढी भाडा लिन दिएको छैन । कसैले लिएको खबर प्रहरीमा जानकारी आउनेबित्तिकै भाडा फिर्ता गर्न लगाउने गरेको जिल्ला प्रहरी कार्यालय बाजुराले जनाएको छ ।

नागरिकले गुनासो मात्रै गरेर हुँदैन, त्यो कुरा सम्बन्धित निकायलाई जानकारी गराउनु पर्छ प्रहरी कार्यालय बाजुराका प्रहरी निरीक्षक कविन्द्रसिंह बोहराले बताउनुभयो । बढी भाडा लिएको साँचो हो भने कानुनी रूपमा कारबाही हुन्छ । उहाँले कोल्टीबाट आएको एक गाडीले यात्रु बढी बोकेको खबर पाउनेबित्तिकै कारबाही गरेको बताउनुभयो ।”

सवारीचालक, नागरिक समाज, जिप व्यवसायी सबैलाई बोलाएर नयाँ भाडादर कायम गरेकाले त्योभन्दा बढी लियो भने स्थानीयले तुरुन्त प्रहरीलाई खबर गर्न प्रहरी कार्यालय प्रमुख जिल्ला अधिकारी भीमकान्त पौडेलले बताउनुभयो । उहाँले भन्नुभयो, “जिल्लामा चल्ने लामो तथा छोटो दुरीका सवारीसाधनले यात्रुसँग बढी भाडा असुल्ने, दुव्र्यवहार गर्ने, क्षमताभन्दा बढी यात्रु राख्ने, मदिरा सेवन गरी सवारी चलाउने गरेमा प्रहरीलाई खबर गर्न आग्रह गर्नुभयो ।” गाेरखापत्रबाट

शीर्ष समाचार

धेरै पढिएको