सरकारले १८ वर्ष उमेर पूरा भएका सबैलाई बुस्टर डोज दिने

काठमाडौं, १८ वर्ष उमेर पूरा भएका सबैलाई सरकारले बुस्टर डोज भ्याक्सिन दिने भएको छ । आज स्वास्थ्य तथा जनसंख्यामन्त्री विरोध खतिवडाले आफूले मन्त्रालयको कार्यभार सम्हालेपछि मन्त्रालयले गरेको कार्यप्रगति विवरण सार्वजनिक गर्दै १८ वर्ष पूरा भएका सबैलाई बुस्टर डोज दिइने जानकारी दिएका हुन् ।

यहीँ माघ २७ गतेदेखि १८ वर्ष उमेर पुगेका सबैलाई बुस्टर डोज खोप प्रदान गर्ने निर्णय भइसकेको र उनले फागुन १ बाट दोस्रो डोज भ्याक्सिन लगाएको कार्डको आधारमा बुस्टर डोज लगाउन पाउने बताएका छन् ।

१२ देखि १७ वर्ष उमेर समूहका करिब ३४ लाख बालबालिकालाई खोप दिने कार्य सुरु गरिएको मन्त्री खतिवडाले भने ।

विगतमा जोखिममा रहेका गर्भवती महिलाहरूलाई मात्र खोप दिइएकोमा हाल सबै गर्भवती महिलालाई (पहिलो त्रैमासिकपछि) खोप दिने नीति अपनाइएको उनको भनाइ छ ।