रोपाइँ शुरु भईसक्दा पनि मल अभाव, किसान आक्रोशित

डोटी, जिल्लामा बर्खे रोपाइँ शुरु भईसक्दा पनि रासायनिक मल अभाव हुँदा किसानलाई समस्या हुँदै आएको छ ।किसानले महिनौँदेखि खेतबारीमा प्रयोग गर्ने रसायनिक मल पाउन सकेका छैनन् । समयमा कहिल्यै मल नपाउने भन्दै किसान चिन्तित र आक्रोशित बनेका हुन् ।

विश्वव्यापी महामारी कोरोना सङ्क्रमणको दोस्रो लहर नियन्त्रण तथा रोकथामका लागु गरिएको निषेधाज्ञाका कारण मल ल्याउन नसक्दा समस्या भएको कृषि सामग्री कम्पनी दिपायल शाखाले जनाएको छ ।

प्रदेश कृषि निर्देशनालयका अनुसार जिल्लामा कम्तीमा पनि १० हजार ८९८ हेक्टर खेतमा धान रोपाइँ हुँदै आएको छ । रोपाइँ गर्ने बेलामा समेत युरिया मल नपाएपछि धान बाली खासै नसप्रिने भन्दै किसान चिन्तित बन्ने गरेको शिखर सिलगढी नगरपालिका–१ का चेतबहादुर बोगटीले सञ्चारमाध्यमलाई बताएका छन् ।

यस वर्ष समयमै वर्षात् शुरु भई डोटीका विभिन्न ठाउँमा धान रोपाइँ शुरु भएको छ । तर मल अभावका कारण धानबाली खासै नसप्रिने भन्दै किसान चिन्तित बनेका सिलगढी नगरपालिका–४ गैराका किसान टीकाबहादुर विकले बताए ।

जिल्लामा मल आपूर्ति व्यवस्थापनको जिम्मा पाएको नेपाल कृषि सामग्री कम्पनी लिमिटेडले समयमै मल खरिद गरी नल्याउँदा अहिले मल अभावको समस्या उत्पन्न भएको यहाँका किसानको आरोप छ ।

यसैगरी नेपाल कृषि सामग्री कम्पनी लिमिटेड दिपायलका अनुसार कैलालीमा रहेको क्षेत्रीय कृषि सामग्री कम्पनीमा समेत मल नभएका कारण आपूर्ति गर्न नसकिएको हो ।