August 17, 2022, Wednesday
२०७९ भाद्र १, बुधबार

गोलभेँडाले मुल्य नपाउँदा किसान मर्कामा, प्रतिकिलो १० रुपैयाँमा बेच्न बाध्य

पाँचथर, जिल्लामा गत वर्ष प्रतिकिलो २० रुपैयाँमा बिक्री भएको गोलभेँडा यसपालि प्रतिकिलो १० देखि १२ रुपैयाँमा बिक्री भइरहेको छ । बन्दाबन्दी र गुणस्तरमा प्रश्न उठ्नाले पाँचथरमा उत्पादित गोलभेँडाले उचित मूल्य पाउन सकेको छैन ।

गोलभेँडाको अत्यधिक उत्पादन हुने जिल्लाको हिलिहाङ र याङवरक गाउँपालिकाका कृषकले यस वर्ष उचित मूल्य प्राउन नसकेका हुन् ।

कोरोना महामारी तथा बन्दाबन्दीका कारण बजार प्रभावित हुनुका साथै अत्यधिक वर्षा हुँदा गुणस्तरीय गोलभेँडा उत्पादन नहुँदा मूल्यमा ह्रास आएको हो ।

याङवरक–६ का गोलभेँडा उत्पादक कृषक रामकुमार गुरागाईँ बताउँछन् “पोहोर साल प्रतिकिलो रु २० भन्दा कम मूल्यमा बेच्नुपरेको थिएन । यसपालि त रु १०/१२ मा बेच्न पनि कठिन पर्‍यो ।” बन्दाबन्दीका कारण गोलभेँडाको बिक्रीमा व्यापारीबीच प्रतिस्पर्धा नहुँदा उचित मूल्य पाउन नसकेको कृषक उनको भनाइ छ ।

उनले भने, “हामी कृषक आफैँले बजार पुर्‍याएर बिक्री गर्न सक्ने अवस्था पनि छैन । निषेधाज्ञाका कारण समयमा व्यापारी नआउँदा कति टमाटर त कुहिएर गयो ।”

२५ रोपनी खेतमा बर्खे गोलभेँडा लगाउनुभएका गुरागाईँले कम्तीमा रु एक लाख आम्दानी गर्ने सोच बनाउनुभएको थियो । “अघिल्ला वर्षहरुमा रु एक लाख ६० हजारसम्म आम्दानी गरेको थिएँ”, उनले भने, “यसपालि त साँवा नै उठेन ।”

यसैबीच हिलिहाङ–१ का केशव भण्डारी यस वर्ष गोलभेँडाले उचित मूल्य पाउन नसकेको बताउँछन् । उनले भने, “रु १०/१२ मा बिक्री भइरहेको छ । यसले कृषकलाई मारमा पार्‍यो ।”

याङवरक–६ का वडा सदस्य यामकुमार काम्बाङ गोलभेँडाले उचित मूल्य नपाउँदा सयौँ परिवार कृषक मारमा परेको बताए । उनले भने, “हामीकहाँ गोलभेँडाको खेती नगर्ने परिवार नै छैनन् । मूल्य निकै कम हुँदा सबै जना मारमा पर्नुभएको छ ।”

शीर्ष समाचार

धेरै पढिएको