November 28, 2020, Saturday
२०७७ मंसिर १३, शनिबार

उत्पादनमा भारी गिरावट आएपछि जोन क्षेत्रकै आलु सङ्कटमा

  • 18
    Shares

काठमाडौं, आलु उत्पादनमा भारी ह्रास आएपछि व्यवसायिक रुपमा आलु खेती गर्दै बागलुङका कृषक अहिले मारमा परेका छन् । अत्यधिक वर्षाका कारण आलु उत्पादन नभएपछि आलु जोनका रूपमा परिचित क्षेत्र अहिले सङ्कटमा परेको हो ।

यसपटक आवश्यक भन्दा बढी वर्षात् भएका कारण आलु उत्पादनका लागि निकै उर्वर मानिएको क्षेत्रमा बीउ जोगाउनसमेत मुस्किल परेको किसानको गुनासो छ ।

बागलुङको ताराखोला, ढोरपाटनलगायत क्षेत्र आलु उत्पादनका लागि निकै उर्बर मानिन्छ । जिल्लाको अधिकांश दुर्गम तथा उच्च पहाडी भेगमा आलु निकै स्वादिष्ट मानिने भएकाले बजार माग उच्च छ । बागलुङमा छ वटा आलुका जोन क्षेत्र छन् ।

जसमध्ये ताराखोला र ढोरपाटनको आलु नेपालभर प्रख्यात छ तर, यस वर्ष आलु उत्पादनमा भारी गिरावट आएपछि आलु जोन क्षेत्रका रुपमा रहेको ढोरपाटन, ताराखोला, तमानखोला, बडिगाड र पाण्डवखानीमै आलुको सङ्कट भएको छ ।

यस वर्ष अत्यधिक वर्षात्का कारण आलु उत्पादनमा ६० प्रतिशतभन्दा बढी गिरावट आएका कारण आलु जोन क्षेत्रमै आलुको अभाव भएको ताराखोला–५ का किसान भक्तप्रसाद बुढाले जानकारी दिएका छन् । “आलु उत्पादन नहुँदै चार लाख पेश्की बुझेको थिए”, बुढाले भन्नुभयो, “आलु नफल्दा आधा रकम फिर्ता गरिदिए ।”

बुढाका अनुसार अहिले त घरमा तरकारी खाने आलुसमेत छैन । ताराखोलाका किसानलाई आलु व्यापारीले आलु नफल्दै पेश्कीस्वरुप नगद अथवा खाद्यान्न सामग्री उपलब्ध गराउँदै आए पनि यस वर्ष आलु उत्पादन नभएका कारण आलुको बीउ मात्रै जोगाइएको बूढाको भनाइ छ ।

अत्यधिक वर्षात्का कारण आलु उत्पादन नभएपछि आलुको जोन क्षेत्रका रुपमा रहेको ताराखोलासहित बागलुङका अन्य क्षेत्रका किसान ठूलो मारमा परेको कृषि ज्ञान केन्द्र पर्वतले जनाएको छ ।

शीर्ष समाचार

धेरै पढिएको