काठमाडौं, भारतको हरिद्वारमा कुम्भमेलाका लागि ठूलो संख्यामा मानिसहरू जम्मा भएको भेलामा नौ वरिष्ठ सन्तसहित सयौँ भक्तजनमा कोरोना संक्रमण पुष्टि भएको छ ।
भारतीय अधिकारीहरूका अनुसार दुई महिनासम्म चल्ने सो मेलाको एक मुहूर्तमा मङ्गलवार ३० लाखभन्दा बढी श्रद्धालुले गङ्गास्नान गरेका थिए । लाखौँ मानिसले बुधवार पनि पवित्र गङ्गा नदीमा स्नान गरेको बताइएको छ ।
भारतमा दैनिकजसो कोरोना संक्रमण तिव्र दरमा बढिरहेको भए पनि उक्त तीर्थस्थलमा ठूलो संख्यामा मानिसहरू भेला भएका थिए । भारतमा गत वर्ष कोभिड महामारी सुरु भएपछि अहिलेसम्मकै सर्वाधिक दैनिक संक्रमण पुष्टि भएको छ ।
बिहीवार बिहान भारत सरकारले २४ घण्टाको अवधिमा २,००,७३९ कोभिड देखिएको तथ्यांक सार्वजनिक गरेको छ । सोही अवधिमा १,०३८ संक्रमितको मृत्यु भएको केन्द्रीय स्वास्थ्य मन्त्रालयले जनाएको छ ।
महामारी फेरि उत्कर्षमा पुग्न लागेका बेला उक्त मेला आयोजना गर्न दिइएको भन्दै सरकारको आलोचना भएको छ । एजेन्सी
प्रतिक्रिया
